राज्यातील २९५ शिक्षण संस्थांची मान्यता रद्द
मुंबई: राज्यातील शिक्षक शिक्षण संस्थांसाठी मोठी कारवाई करण्यात आली असून, राष्ट्रीय शिक्षक शिक्षण परिषद (NCTE) ने महाराष्ट्रातील एकूण २९५ संस्थांची मान्यता रद्द केली आहे. या निर्णयाचा फटका प्रामुख्याने डीएड, बीएड आणि एमएड अभ्यासक्रम चालवणाऱ्या संस्थांना बसला आहे.
शासनाच्या नियमांची अवहेलना
प्रत्येक शिक्षण संस्थेस दरवर्षी त्यांची शैक्षणिक व प्रशासकीय कामगिरीचा अहवाल केंद्र सरकारच्या एनसीटीईकडे सादर करणे बंधनकारक आहे. मात्र, संबंधित संस्थांनी ही जबाबदारी पार पाडली नाही. त्यामुळे त्यांच्यावर ही कठोर कारवाई करण्यात आली आहे.
प्रवेश प्रक्रियेवर परिणाम
मान्यता रद्द झालेल्या संस्थांना आता शिक्षक शिक्षण कार्यक्रमात प्रवेश देण्यास परवानगी नाकारण्यात आली आहे. यामुळे हजारो विद्यार्थ्यांचे भविष्य अंधारात जाण्याची शक्यता निर्माण झाली आहे.
एनसीटीईचे अध्यक्ष शैलेश नारायण झाला यांनी माहिती देताना स्पष्ट केले की, "संस्थांनी वेळेवर कागदपत्रे सादर करणे अपेक्षित असते. नियमांचे पालन न करणाऱ्यांना यापुढे संधी दिली जाणार नाही."
अल्पसंख्याक संस्थाही रडारवर
या कारवाईत काही अल्पसंख्याक शिक्षण संस्थांचाही समावेश आहे. यामध्ये बीएड आणि एमएड प्रमाणपत्र देणाऱ्या अनेक संस्थांचा समावेश आहे, ज्यामुळे शिक्षक बनण्याचे स्वप्न पाहणाऱ्या विद्यार्थ्यांवर परिणाम होणार आहे.
या कारवाईमुळे शिक्षण संस्थांच्या कार्यपद्धतीवर आणि पारदर्शकतेवर प्रश्न उपस्थित होऊ लागले आहेत. शैक्षणिक दर्जा उंचावण्यासाठी असे निर्णय आवश्यक असल्याचे मत शिक्षण तज्ज्ञ व्यक्त करत आहेत.
0 टिप्पण्या